25/02/2018

Presentación, en directo, de amada Rosalía polas redes sociais

Onte, 24 de febreiro, Día de Rosalía de Castro presentei en directo polas redes sociais, Facebook e Instragram, o libro amada Rosalía, adicado á nosa autora universal.

Foi unha presentación distinta, moi especial, á que calquera podía sumarse e seguila alá onde se atopase, tamén interactuar ou deixar o seu comentario.

Coido que é un novo xeito de achegar os traballos ao público que o demande, tamén os literarios, de amosalos ao mundo sen distancias e impedimentos físicos, un vieiro que cómpre ir explorando e aproveitando en prol da literatura, por que non?

Deixo aquí a gravación completa da presentación.

24/02/2018

amada Rosalía

Hoxe, 24 de febreiro, Día de Rosalía de Castro, publiquei o libro amada Rosalía adicado a nosa poeta universal en Amazon nunha edición electrónica.


O libro contén 85 poemas e está dividido en 4 partes, a primeira PARA CANTAR, contén un só poema; a segunda NOSO CANTO, recolle 44 poemas, na terceira parte EN SOIDADE son catro os poemas e por último CANTANDO contén 36 poemas. Compaxino poemas con haikus, estes, os haikus inspirados nunha palabra que ía escollendo da obra e da vida de poeta, do mesmo xeito fixen cos poemas, escollín versos da obra de Rosalía, tamén algunha reflexión súa e escribín os poemas inspirándome no seu sentir, dalgún xeito, salvando todas as distancias, ao xeito dos Cantares Gallegos. Para a cuarta parte do libro, aínda que empreguei o mesmo sistema, de escoller un verso para cada composición, o que fixen foi seleccionar eses versos de outras, e outros poetas e escritoras que lle escribiron a Rosalía, escollín 18 autores, coa única salvedade que todos están mortos. Fáltame algúns autores, coido que si, mais non fluíu a meu pensamento cos seus versos ou cos seus escritos a Rosalía para esta publicación.

Escollín versos, ou unha frase que podería ser un verso de: Aurelio Aguirre, Manuel Curros Enríquez, Eduardo Pondal, Federico García Lorca, Teixeira de Pascoães, Luís Pimentel, Ramón Cabanillas, Celso Emilio Ferreiro, Eduardo Blanco Amor, Salvador Espriu, Xosé María Álvarez Blázquez, Valentín Paz-Andrade, Maria-Mercè Marçal, Uxío Novoneyra, Sophia de Mello Breyner, Eugénio de Andrade, Xosé Neira Vilas e Xohana Torres.

Aos poemas íalle engadindo haikus, e así foi como concluín con 84 poemas. Mais faltaba un, si, un poema máis, Rosalía morreu en 1885, e pensei que terían que ser 85 os poemas que completasen a publicación. Ese poema só podería estar inspirado, neste caso en parte dunha frase que Manuel Murguía lle adicou a súa muller en Los precursores e que di "Las musas necesitan tocar con sus alas la realidad".

Quería adicarlle un libro a Rosalía dende que coordinei os 150 Cantarespara Rosalía de Castro, máis entón non tiña claro o que quería facer, de que xeito ía percorrer ese camiño da súa man, finalmente pensei que o mellor xeito de mergullarme neste traballo sería ir á orixe do seu aos Cantares Gallegos.

Beizóns!

21/01/2018

Infindos latexos de esencia poética

O pasado 7 de xaneiro rematei a achega que fun, día a día, vertendo no Facebook cun haiku diario ata completar 120 días (4 meses), e que finalmente lle dei a forma de libro. Leva por título “Infindos latexos de esencia poética”, e quería que o proxecto que tanto tempo me ocupou, e que foi medrando nas redes coa axuda e o alento de quen comparte a súa paixón pola poesía, non ficase diluído neste mar imposible de abarcar.


Estiven uns poucos de días maquetando, vaia traballo, e dándolle forma para que resultase cómodo á lectura, tamén corrixindo algunhas grellas que non vin no momento en que ía publicando os haiku, case sobre a marcha.

Como dicía foron 120 haiku publicados e que ía escribindo nun caderno pequeniño, mais este libro recolle 1 haiku máis que é un agasallo para quen o lea, ademais é un haiku moi especial para min, coido que tamén moi fermoso.

Faime moita ilusión comezar o ano publicando un libro de haiku, e ogallá resulte do voso agrado.

Por menos do que custa un café, 0,99 €, podes descargalo dende Amazon.

Beizóns e feliz lectura!!!

17/01/2018

Vídeo da presentación de O sol dentro da cabeza na libraría Cartabón

Comparto o vídeo da presentación de O sol dentro da cabeza, publicado por Laiovento, e que aconteceu o pasado 27 de decembro, coa participación do prezado Ramón Nicolás, na libraría Cartabón de Vigo.

11/01/2018

Presentación en Entrimo de O sol dentro da cabeza

Hai lugares onde o tempo se conxuga doutro xeito, onde a memoria xoga ceibe e os pensamentos reconfórtanse coa verba amiga, coa verba irmán.

Ramón Alonso, Suso, José Lamela Bautista

O venres 29 de decembro presentamos, en Entrimo, O sol dentro da cabeza. Contei coa participación e a complicidade do alcalde do municipio, Ramón Alonso, que abriu as portas do Concello a este acto cultura para os seus veciños, tamén co amigo, investigador e escritor José LamelaBautista que tivo a ben facer unha presentación moi entrañable deste último traballo que me publicou Laiovento e que é unha homenaxe moi particular a Carlos Casares neste ano pasado que foi o seu ano da Letras.

Achegarse a Entrimo é algo que fago acotío cando estou pola casa de meus pais. Son moitas as amizades que conservamos nestas terras arraianas, e tamén hai unha importante carga emocional, non se poden esquencer os momentos vividos na mocidade aquí, tamén na infancia.


Foi unha tarde moi entrañable, tivemos tempo para falar das familias, dos problemas demográficos aos que se enfrontan os lugares do interior de Galicia, e tamén dos problemas que está a ter o galego para se manter como lingua propia, tamén para falar desa variante do galego que falamos nós na Baixa Limia e que se vai esgotando dun xeito alarmante.

MariPaz, Emma, Suso

Nas datas de Nadal retornan veciños que viven, ou vivimos lonxe, que aproveitamos para nos atopar en actos coma o que nos permitiu o concello de Entrimo, foi unha ledicia atoparnos con Emma, veciña de Compostela e coa que vivimos moitos momentos da infancia e a mocidade.

José Lamela Bautista
Quería que esa presentación, nunha Casa do Concello que coñezo moi ben, que visitei moitas veces por distintos motivos, e no que desenrolou súa vida laboral José Rodríguez, un destacado entrimeño, unha boa persoa e un amigo que posuía o don dun sorriso perenne, e que boto en falla cando atraveso aquela porta. O acto foi unha humilde homenaxe para el que fica no recordo.


Ofrecéndolle o libro a Santa María A Real

Beizóns!

10/01/2018

Presentación de O sol dentro da cabeza na libraría Cartabón en Vigo

O pasado 27 de decembro presentamos en Vigo, na libraría Cartabón, O sol dentro da cabeza, acompañado polo prezado amigo Ramón Nicolás.


Foi unha desas tardes de choiva mansa nunha cidade de reencontros e que tanto sufriu no pasado outono coa vaga de incendios que cercaron Vigo.

Encontrarse, aínda que soamente sexa nestas ocasións, con amigos cos que compartimos afección pola literatura, sempre resulta moi agradable e moi enriquecedor. Aproveitar para falar da lingua, da poesía, dos tempos que nos toca vivir con todas as ilusións postas en seguir achegando traballos literarios a un público que quere manter una literatura de noso.

Compartir mesa co crítico que sente no verso a pulsión da palabra é o mellor xeito de achegarse o sentir dos lectores, de seguir ollando con esperanza un futuro que semella complexo para unha lingua, e a literatura dun pobo.


Sempre agradecido a Maribel e Gonzalo por abrirme as portas da súa libraría onde me sinto en familia.






Moi agradecido a todas e todos os que viñestes á presentación.





Beizóns!